مقال ( البيضة و اللي سلقها و اللي اكلها ... )

طبعا كلنا عارفين لعبة البيضة اللي هي .... ادي البيضة و ادي اللي سلقها و ادي اللي قشرها و ادي اللي اكلها و ادي اللي كغكغكغكغكغكغ, لعبة على طول بنلعبها مع اطفالنا الصغيرين – اللي هما المستقبل – و اكيد لو المستقبل بنلعب معاه بالشكل ده اكيد هيكون مستقبل مشرق و مزدهر (ايموشن استغراب) المهم احنا عمرنا ما فكرنا ايه هو المعنى الوجودي العبثي الفلسفي من هذه اللعبة البسيطة التي تحمل العديد من البواطن - متخيل حالة الاستغراب اللي انتوا فيها دلوقتي - ..... انا هقولكوا على المعاني الفلسفية اللي موجودة في اللعبة .

بعد التأمل في اللعبة اتضح الاتي :

اولا :

ادي ... كلمة تعود على الشخص المنوط بفعل الفعل و مع تحليل كلمات اللعبة نجد ان جملة .... "ادي البيضة" هنفهمها بعدين .... "ادي اللي سلقها و ادي اللي قشرها" ... اللي دايما بيسلق البيض و يقشروا هو الشخص القادر على الوقوف امام نيران البوتاجاز و الامساك بالبيضة بعد السلق و هي سخنة و بيتضح ان ادي دي بتعود على – بص حواليك و اتأكد انك لوحدك و بحذر – ادي دي .... بتعود على المسئولين

ثانيا :

"ادي اللي اكلها" .... من زمان لما كنا بنلعب اللعبة دي محدش كان بيشارولنا على اللي اكل البيضة و مع التحليل و التمحيص و تقصي الحقائق نعرف ان الذي اكل البيضة هو اللي سلقها و هو اللي قشرها  لانه مش معقول يقف قدام النار و يسلق البيضة و يقشرها و يديهالنا ناكلها احنا , اللي هو مين بقى اللي اكلها ؟؟؟؟ .... شوف انت بقى

ثالثا :

ادي الي كغكغكغكغكغكغكغ .... اللي كغكغكغكغكغ ده بقى اللي هو احنا  .... اللي بنلاقي البيضة بتتاكل قدامنا و نضحك و نسقف و نطبل للي بياكلها و بعدها بنقول للي اكلها ... تاني تاني تاني ... يروح لاعب معانا اللعبة من تاني .... و هكذا و هكذا و هكذا ...

طبعا انتوا دلوقتي عرفتوا ايه هي البيضة ؟؟؟؟!!!!